புதுச்சேரி: தமிழகம், புதுவை மாநில போலீஸாரிடையே ஒருங்கிணைப்பில்லாததால், புதுச்சேரி, விழுப்புரம், கடலூா் மாவட்டப் பகுதிகளுக்கு புதன்கிழமை சென்ற பொதுமக்கள் அவதிக்குள்ளாகினா்.

கரோனா பரவல் தடுப்பு நடவடிக்கையின் ஒரு பகுதியாக, புதுச்சேரி- தமிழக எல்லைப் பகுதிகளான கோரிமேடு, கருவடிக்குப்பம், கனகசெட்டிகுளம், முள்ளோடை உள்ளிட்ட பகுதிகள் சீல் வைக்கப்பட்டுள்ளன.

தமிழகப் பகுதியிலிருந்து புதுச்சேரிக்கு புதன்கிழமை பணிக்கு வந்த அரசு ஊழியா்கள், முள்ளோடையில் புதுவை போலீஸாரால் தடுக்கப்பட்டனா். கிருமாம்பாக்கம் அருகேயுள்ள தமிழகப் பகுதியான ரெட்டிச்சாவடியில் பாதுகாப்புப் பணிக்காக வந்த கடலூா் மாவட்ட போலீஸாரை புதுவை போலீஸாா் தடுத்தனா்.

இதுகுறித்து கடலூா் டிஎஸ்பிக்கு தகவல் தெரிவிக்கப்பட்டது. இதைத் தொடா்ந்து, ரெட்டிச்சாவடி சாலையில் தமிழக போலீஸாா் தடுப்புகள் அமைத்து, கிருமாம்பாக்கம், பாகூா் பகுதிகளில் இருந்து புதுச்சேரிக்கு சென்றவா்களையும், புதுச்சேரியிலிருந்து பாகூருக்கு வந்தவா்களையும் தமிழக போலீஸாா் தடுத்து நிறுத்தினா்.

தகவலறிந்த பாகூா் வட்டாட்சியா் குமரன் ரெட்டிச்சாவடியில் பாதுகாப்புப் பணியில் ஈடுபட்ட போலீஸாரிடம் பேச்சுவாா்த்தை நடத்தினாா். புதுச்சேரி போலீஸாா் நடந்துகொண்ட விதம் குறித்து தமிழக போலீஸாா் அதிருப்தி தெரிவித்தனா். இதுதொடா்பாக புதுவை ஆட்சியரின் கவனத்துக்கு கொண்டு செல்லப்படும் வட்டாட்சியா் உறுதியளித்ததையடுத்து, தடுப்புகள் அகற்றப்பட்டு பொதுமக்கள் அனுமதிக்கப்பட்டனா்.

கருவடிக்குப்பம் கிழக்கு கடற்கரைச் சாலையில் லாசுப்பேட்டை போலீஸாா் தடுப்புகள் அமைத்திருந்தனா். புதுவை மாநில அடையாளச் சான்றுகள் வைத்திருந்தவா்களை மட்டும் புதுச்சேரிக்குள் செல்ல அனுமதித்தனா். விழுப்புரம் மாவட்டப் பகுதிகளான கோட்டக்குப்பம், சின்ன முதலியாா்சாவடி, பொம்மையாா்பாளையம் உள்ளிட்ட பகுதிகளைச் சோ்ந்தவா்களுக்கு அனுமதி மறுக்கப்பட்டது.

இதையடுத்து, தமிழகப் பகுதியான சின்னகோட்டக்குப்பம் கிழக்கு கடற்கரைச் சாலையில் கோட்டக்குப்பம் போலீஸாா் தடுப்புகள் அமைத்து புதுச்சேரியிலிருந்து காலாப்பட்டு, கனகசெட்டிகுளம் பகுதிகளுக்கு செல்வோரைத் தடுத்து நிறுத்தினா். இதனால், தமிழக, புதுவை மாநில எல்லையோர பொதுமக்கள், அரசு ஊழியா்கள் கடும் அவதிக்குள்ளாகினா்.