கோட்டக்குப்பம் பேரூராட்சிக்கு உட்பட்ட சின்ன கோட்டக்குப்பம் சமரசம் நகர் பகுதியில் சுமார் 700க்கும் மேற்பட்ட குடும்பத்தினர் வசித்து வருகின்றனர். இப்பகுதியில் பெண்கள் மற்றும் குழந்தைகளுக்கு கழிவறை கட்ட வேண்டும் என பல ஆண்டுகளாக அரசுக்கு மக்கள் கோரிக்கை  விடுத்து வந்தனர். இதன் பயனாக கடந்த 2012-13ம் ஆண்டில் நபார்டு நிதியுதவியுடன் அப்பகுதியில் ரூ.12 லட்சம் மதிப்பில் ஒருங்கிணைந்த பெண்கள் மற்றும் குழந்தைகளுக்கான கழிவறை கட்டப்பட்டது. பணிகள் அனைத்தும் முடிந்த நிலையில் அந்த கழிவறை வளாகம் இன்னும் பயன்பாட்டுக்காக திறந்துவிடப்படவில்லை. இதனால் இப்பகுதியில் உள்ள பெண்களும், குழந்தைகளும் இயற்கை உபாதைகளை கழிக்க அவதி அடைந்து வருகின்றனர்.

பல லட்சம் செலவில் கட்டப்பட்ட அந்த கழிவறை வளாகத்தில் சமூக விரோதிகள் மது அருந்துதல், சூதாட்டம் உள்ளிட்ட குற்ற செயல்களில் ஈடுபடுகின்றனர். இதுகுறித்து மக்கள் புகார் அளித்ததால் தற்போது கழிவறை வளாகத்தை பேரூராட்சி நிர்வாகம் சுத்தம் செய்து, பூட்டு போட்டு பூட்டியுள்ளது. இருந்தும், இதுவரை அதை பயன்பாட்டுக்கு திறந்துவிடவில்லை. எனவே கழிவறை வளாகத்தை பெண்கள், குழந்தைகளின் பயன்பாட்டுக்காக திறந்து விட கோட்டக்குப்பம் பேரூராட்சி நிர்வாகம் உரிய நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனர்.

நன்றி : தினகரன்