கோட்டக்குப்பம் பேரூராட்சியில் 18 வார்டுகள் உள்ளன. இங்கு வசிக்கும் மக்களுக்கு பேரூராட்சி மூலம் குடிநீர் வினியோகம் செய்யப்படுகிறது. பருவமழை பொய்த்துவிட்டதால் இந்த பகுதியில் போதுமான தண்ணீர் இல்லை. இதனால் குடிநீர் பற்றாக்குறையால் மக்கள் அவதிப்பட்டு வருகிறார்கள்.

இந்தநிலையில் பேரூராட்சி மூலம் வீடுகளுக்கு குடிநீர் வினியோகம் செய்யப்படும்போது சிலர் திருட்டுத்தனமாக குடிநீர் குழாயில் வரும் தண்ணீரை மின்மோட்டார்கள் மூலம் உறிஞ்சுவதாகவும், இதனால் பல வீடுகளுக்கு குடிநீர் கிடைப்பதில்லை எனவும் பேரூராட்சி அதிகாரிகளிடம் புகார்கள் தெரிவிக்கப்பட்டன.

இந்த நிலையில் கோட்டக்குப்பம் பேரூராட்சி செயல் அலுவலர் செந்தில்குமார் மற்றும் ஊழியர்கள் வீடு, வீடாக சென்று திடீர் சோதனை நடத்தினார்கள். அப்போது சில வீடுகளில் திருட்டு தனமாக மின்மோட்டார்கள் மூலம் குடிநீர் உறிஞ்சப்படுவதை கண்டு பிடித்தனர். அந்த பகுதியில் 15–க்கும் மேற்பட்ட மின்மோட்டார்களை அவர்கள் பறிமுதல் செய்தனர். இதுகுறித்து செயல் அலுவலர் செந்தில்குமார் கூறும்போது, குடிநீர் குழாயில் இருந்து மின்மோட்டார் மூலம் தண்ணீர் உறிஞ்சினால் கடும் நடவடிக்கை எடுக்கப்படும் என்று எச்சரித்தார்.